Home Kosova Reçica:Ndëshkim kush nuk respekton të drejtat e punëtorëve

Reçica:Ndëshkim kush nuk respekton të drejtat e punëtorëve

Ministri i Punës dhe Mirëqenies Sociale, Skënder Reçica, ka deklaruar se do të jenë të pa kompromis ndaj të gjithë atyre që nuk respektojnë të drejtat e punëtorëve.

Këto komente ai i ka bërë gjatë vizitës që e ka bërë në qendrën tregtare ETC, ku ka inspektuar se sa respektohen të drejtat e punëtorëve dhe ligji i punës.

Ministri Reçica tha se ka kërkuar edhe ndaj Inspektoratit të Punës që të jenë në krye të detyrës dhe të jenë të pa kompromis ndaj atyre që nuk respektojnë dispozitat ligjore.

Reçica: Po informohemi nga afër për kushtet e punës

“Po informohemi nga afër për kushtet e punës, për kushtet që kanë të bëjnë me respektimin e të drejtave të tyre. Natyrisht kjo vizitë e sotshme ka të bëjë me ngritjen e vetëdijësimit nga ana e punëdhënësve, por edhe nga ana e punëmarrësve që respektimi i të drejtave të punëtorëve është e drejtë e garantuar me ligj. Ne si ministri në bashkëpunim me punëdhënësit po përpiqemi që t’i bashkërendojmë aktivitetet që Inspektorati i Punës, i cili është i thirrur për të monitoruar ligjin që ka të bëjë me sigurinë në punë, ligjin që ka të bëjë me marrëdhëniet e punës, me të drejtën e punonjësve të zbatohet në tërësi. Ne kemi kërkuar  nga Inspektorati që në të gjitha rastet ku hasen në moszbatueshmëri të këtyre dispozitave ligjore ne do të jemi të pa kompromis”, tha ai.

Kreu i Ministrisë së Punës, u ka bërë thirrje të gjithë punëtorëve që të raportojnë shkeljet që u bëhen nga punëdhënësit.

Reçica: Ju bëjë ftesë të gjithë punëtorëve që duhet të bashkëpunojmë

“Ju bëjë ftesë të gjithë punëtorëve që duhet të bashkëpunojmë, sepse vetëm bashkëpunimi punëdhënës dhe punëmarrës me institucionet që kanë të bëjnë me monitorimin e dispozitave ligjore mund të na sjellin në një situatë ku të drejtat e punëtorëve të jenë më të avancuara”, tha ai.

Kurse, menaxheri në kompaninë “ELKOS”, Petrit Selmanaj, ka thënë se mundohen që të respektojnë të drejtat e punëtorëve.

Selmanaj: Rreth 95 përqind të ligjit rreth kushteve të punës e kemi implementuar

“Ne si kompani “ELKOS” mundohemi dhe realisht ia kemi arritur qëllimit që mbi 95 përqind të ligjit që është rreth kushteve të punëtorëve me implementua në të gjitha aspektet, si në aspektin e pushimeve, pagesave, orarit të punës, sigurimeve shëndetësore e plot të tjera”, tha ai.

Ministri i Punës dhe Mirëqenies Sociale, Skënder Recica së bashku me Inspektorin e Punës Basri Ibrahimi, kanë zhvilluar edhe biseda me punëtorët.