Fushata elektorale për zgjedhjet e 14 majit pritet të mbyllet sot, ndërsa të dielën qytetarët do u drejtohen kutive të votimit. Edi Rama ka rezervuar takime në Shkodër dhe Durrës. Në Shkodër takimi përmbyllës do të mbahet rreth orës 16.30 ndërsa në Durrës në orën 19.00 qytet i cili do të përmbyllë edhe fushatën e selisë rozë. Ndërsa dje fushata e PS-së u mbyll në Tiranë.
Enkelejd Alibeaj dhe koalicioni Meta-Berisha kanë rezervuar takime në kryeqytet. Të dy kanë vendosur që fushatën ta përmbyllin në takime me mbështetësit në Tiranë.
Në kuadër të fushatës elektorale për zgjedhjet e 14 majit, e cila pritet të mbyllet sot në të gjitha qytetet dhe bashkitë përkatëse, në Lezhë kandidati i Partisë Socialiste për këtë bashki është ndalur në një takim me banorët e Shëngjinit ku ka cituar edhe njëherë disa nga projektet kryesore që janë në fokus të programit të tij.
“Bashkë me projektin e kanaleve të ujërave të zeza dhe të bardha, një investim i cili do të zgjidhë njëherë problematikat dhe do të vendosë standarte të larta të ujit në Shëngjin. Menjëherë pas ujësjellësit do të bëjmë shtrimin me asfalt të të gjitha cepave të rrugëve të Shëngjinit, në të gjithë territorin dhe në të gjitha rrugicat pa përjashtim. Gjithashtu rrugët do të pajisen me sinjalistika horizontale dhe vertikale bashkëkohore”, u shpreh Ndreu.
