Home Opinion Të gjitha arsyet se përse Rama është i interesuar që vulën e...

Të gjitha arsyet se përse Rama është i interesuar që vulën e PD ta ketë Berisha

Nga Poli Hoxha

Seancën e kësaj të enjteje në parlament për çështjen “McGonigal” e hapi Enkelejd Alibej, i cili i drejtoi Edi Ramës 30 pyetje pikante dhe të ndërtuara në mënyrë profesionale. Ajo që u pa ndërkohë, ishte Edi Rama në karrigen e kryeministrit që nxinte i gjithi.

Pas Alibeajt, në podium doli Sali Berisha, i cili në stilin e tij të zakonshëm nisi që të paralajmëronte se nëse Rama nuk përgjigjej për akuzat, atëherë Shqipëria do të zhytej në kaos dhe vetëm në kaos. Ndërkohë që kreu i Rithemelimit fliste, Edi Rama, u zhvendos në sallë dhe ul afër Pandeli Majkos. Hija e zezë që i kishte rënë kur dëgjonte pyetjet e Alibeajt, ju zhduk si me magji dhe kamerat e fokusuan duke qeshur me të madhe.

Pas Berishës e mori fjalën vetë. Shmangu si një i pandehur çdo sqarim për komplotin që ka stisur me McGonigal kundër PD-së dhe Lulzim Bashës dhe në shumicën e fjalimit, u morr me Berishën dhe revolucionin.

Pasi fyeu dhe talli si gjithmonë, pjesa e re në fjalën e tij ishte përmendja me iniciale e disa personave, të cilët financojnë revolucionin. Për njërin prej tyre, “Personin Z”, la për të nënkuptuar se bëhej fjalë për djalin e ish- kryeministrit, Zen Berishën. Përtej financimit të revolucionit, kryeministri e lidhi “Z-në”, edhe me rusët. Tha këto dhe iku, duke e lënë “mishin e dhisë” në sallë.

Në daljen e dytë në foltoren e parlamentit, Sali Berisha, nuk u kundërpërgjigj për personat me iniciale që i përmendi kryeministri, por përsëriti sërish paralajmërimin për një destabilizim të vendit.

Pra loja vazhdon. Lojtarët janë të njëjtët; Edi Rama dhe Sali Berisha. Mesazhi për SHBA dhe Perëndimin është i qartë: Në Shqipëri ka vetëm dy pole pa rivalë, të cilët në këtë vend kanë në dorë pushtetin, opozitën, shiun, diellin dhe qametin.

Që të dy nuk e fshehin më, se janë në të njëjtën varkë me vrima gjithandej e cila ka të shkruar: “Mbartës të korrupsionit madhorë dhe minues të demokracisë”.

Duke qenë formalisht dhe zyrtarisht në të njëjtën varkë në oqeanin e drejtësisë shqiptare dhe të SHBA, është e drejta e tyre për të bashkëpunuar me çdo mjet e mënyrë, që të mos mbyten.

Kjo është arsyeja thelbësore se përse edhe vendimin e gjykatës së Apelit për “vulën” e PD, e presin të dy si një komardare shpëtimi.

Po përse Edi Ramës i intereson që vulën, logon dhe simbolet e PD ti ketë “revolucioni” i Sali Berishës?

Nëse e vutë re, Edi Rama në parlament dhe Sali Berisha te shkallët e tij, në sinkron të plotë sulmuan egër Lulzim Bashën duke përmbysur të vërtetën e skandalit “McGonigal”, i cili u sajua dhe u pagua pikërisht për të groposur Bashën nëpërmjet sajimit të “parave ruse”.

Sali Berisha thotë se Edi Rama ka ndërhyrë në gjykatë, që vulën e PD-së ta marrë grupi properëndimor i PD-së. Nëse kjo do të ishte e vërteta dhe jo e kundërta, përse ky kryeministër që kontrollon gjykatat, nuk ndërhyri edhe në gjyqin e parë, kur Agron Zhukri dha vendimin pro Kuvendit të Stadiumit?!

Edi Rama për herë të parë në seancën e kësaj të enjteje për “McGonigal”, nuk ja përmendi Sali Berishës “nongartën”. Kjo sepse de jure, edhe vetë është “nongrata” nga SHBA, ndërkohë që e ka të sigurt që do të bëhet i tillë edhe de fakto, menjëherë pasi të humbasë imunitetin si kryeministër i një vendi anëtarë i NATO.

Ramës i intereson një Sali Berishë “nongrata” dhe me vulë në xhep për të mbajtur në lojë përball Perëndimit jo vetëm veten, por edhe “nongratat”, Vangjush Dako, Tom Doshi dhe Aqif Rakipi, të cilët i ka indirekt ende në kupolën e Rilindjes dhe në grupin parlamentarë.

Edi Ramës gjithashtu i duhet Sali Berisha me vulë dhe si “opozitë zyrtare” në vend, për ta mbajtur vendin në një krizë politike permanente, duke i dërguar mesazhe SHBA, në këto kohë delikate të luftës në Ukraninë. Synimi është që aleatët ta ndajnë mendjen, se pavarësisht korrupsionit dhe shkatërrimit të demokracisë që përfaqësojnë, Shqipëria ka dy faktorë të vetëm; PS-në e Ramës dhe PD-në e Berishës.

Pra ata dhe shqiptarët kanë vetëm dy alternativa, dy të këqija “ligjore”, mes të cilave mund të zgjedhin. Dhe kuptohet, farsën se “e keqja më e mirë” që mund të ruajë stabilitetin është ai, Edi Rama e luan shkëlqyer.

Gjithashtu Edi Ramës i duhet Berisha me vulë, sidomos për hallet e tija fare- fare personale. Vërtet Interpol po heton për “Personin O” që është i vëllai, por kemi edhe personin “Z”, që është djali i “kreut” të opozitës shqiptare. I duhet sidomos si i vetmi investim për të qëndruar në pushtet dhe si e vetmja mënyrë, (dëshpëruese në fakt), për të shpëtuar nga SPAK dhe nga SHBA.

Nuk ka zgjedhje lokale në 14 maj, sepse ato i ka marrë në tavolinë, por edhe sepse realisht nuk i interesojnë, (Vula po), as atij as Sali Berishës. Por ato për pushtetin qendror, po vijnë shpejt.

Tani imagjinon Edi Ramën dhe Sali Berishën së bashku në vitin 2025. Jo sërish në studion e piktorit Ramadan Karanxha si plot 34 vite më parë, janar 1991, por në ndonjë nga strofullat e Saimir Manes apo Shefqet Kastratit duke biseduar për hallet e pushtetit, pasurisë dhe ato personale natyrisht:

Rama: Sali ti gëzojmë vulat e  “pluralizmit” shqiptarë, sa ti kemi ne nuk e rruajmë për “nongrata” e për SPAK!

Dhe Berisha: Ti gëzojmë Edvin bashkë me Sajen, Çetin, “Personin Z” dhe “Personin O”. Kjo ishte loja!

Previous articleKurti në takim me ambasadorët e QUINT-it: Procesi i anëtarësimit në KiE, duhet të vazhdojë pa vonesë
Next articleBusquets do të largohet nga Barcelona në fund të sezonit