Greva të mëdha janë zhvilluar në Francë që kur qeveria njoftoi planet për të rritur moshën e pensionit nga 62 në 64 vjec. Presidenti Emmanuel Macron pretendon se ndryshimet janë të nevojshme për ta bërë sistemin e pensioneve financiarisht të qëndrueshëm, pasi njerëzit aktualisht jetojnë më gjatë.
Në shumicën e vendeve të BE-së, ku qytetarët pritet të punojnë mbi 64 vjeç, janë të shumtë ata që nuk i kuptojnë protestat e francezëve. Por një kritikë kryesore ndaj reformës është se ajo i penalizon ata me punë të vështira fizike, dhe do ta kenë më të vështirë të punojnë për më shumë kohë.
Njerëzit që zhvillojnë punë manuale gjithashtu priren të kenë të ardhura më të ulëta, gjë që lidhet me një jetëgjatësi më të ulët. Kjo do të thotë se nëse një punëtor i këtij sektori del në pension në moshën 64 vjeçare, ata potencialisht do të kenë më pak vite për të shijuar pensionin e tyre me shëndet të mirë.
Gratë gjithashtu pretendojnë se do të preken në mënyrë disproporcionale, pasi shumë prej tyre kanë ndërprerje në karrierë për shkak të fëmijëve. Kjo shpesh pasohet nga puna me kohë të pjesshme, që do të thotë se grave mund t’u duhet më shumë kohë për të arritur numrin e kërkuar të kontributeve pensionale.
Qeveria e Macron pretendon se reforma e tyre do të reduktojë pabarazitë ekzistuese duke rritur normën minimale të pensionit. Kritikët e saj thonë se është e paqartë se kush do të kualifikohet. Sipas rregullave aktuale, pensionet e grave franceze janë 40% më të ulëta se ato të burrave, pasi pabarazia në paga ka një efekt negativ në daljen në pension.
Për momentin, përballja vazhdon, pasi sindikatat planifikojnë greva gjatë gjithë muajit mars.
