Home Sport Partizani, fitore për infarkt! Teuta “dehet” në 6 minutat e fundit

Partizani, fitore për infarkt! Teuta “dehet” në 6 minutat e fundit

26 November, 2021

Në “Elbasan Arena” ndeshja e parë e javës së 10-të mes Partizanit dhe Teutës rezultoi një çmenduri e vërtetë teksa kryeqytetasit fitojnë me shifrat 2-1 vetëm në 6 minutat e fundit. Durrsakët ishin të parët që iu afruan portës së Teqjas kur në minutën e 20-të Lorenco Vila por edhe Gjorgjiev nuk u treguan konkretë.

Megjithatë maqedonasi nuk gaboi 6 minuta më vonë kur do të gjente rrjeten me një diagonale të bukur e me një mbrojtje të përgjyumur. Të kuqtë protestuan për pozicion jashtë loje, por VAR konfirmoi gol.

Në minutën e 86’ do të kishte moment tensioni kur Albano Aleksi dhe Albion Marku e kthejnë në personale me arbitrin Kreshnik Bajramaj që detyrohet ti nxjerrë kartonin e kuq. Brenda 6 minutave ndodh më e çuditshmja, që edhe vetë Ilir Daja as nuk do e mendonte. Një penallti në minutën e 90’ për një prekje të topit me dorë kthehet në gol nga Stenio Zhunior, ndërsa skenën do e rrëmbente Tedi Cara i cili pas një veprimi të bukur mposhti Pano Qirkon duke i dhuruar 3 pikë Partizanit.

Vendi i 5-të për skuadrën kryeqytetase që merr pak frymë në klasifikim duke parë Europën në horizont, ndërsa kjo humbje në fund, padyshim që mund të godasë nga ana psikologjike skuadrën e Teutës.