E hëna vjen me një lajm “bombë”, që i paraprin mbledhjes së Komitetit Ezekutiv të UEFA-s, ku do të vendoset për ndryshimet në formatin e kompeticioneve europiane.
12 klubet të mëdha në Kontinent kanë themeluar brenda natës Superligën e Europës, pavarësisht kërcënimeve të UEFA-s, FIFA-s dhe ligave kombëtare: Në noftim shkruhet: “12 klube prestigjioze të futbollit europian sot, së bashku, shpallën një marrëveshje për të krijuar një kampionat të ri futbolli, Super League, e drejtuar nga klubet themeluese, që janë si më poshtë:
“AC Milan, Arsenal FC, Atletico de Madrid, Chelsea FC, FC Barcelona, FC Internazionale Milano, Juventus FC, Liverpool FC, Manchester City, Manchester United, Real Madrid CF dhe Tottenham Hotspur janë bashkuar si Klubet Themeluese. Tri klube të tjera pritet të bashkohen si klube themeluese përpara sezonit përurues, i cili duhet të fillojë sa më shpejt të jetë e mundur “.
Në njoftim shpjegohet më tej se: “Duke menduar për të ardhmen, klubet themeluese shpresojnë të vazhdojnë bisedimet me UEFA-n dhe FIFA-n në kërkim të zgjidhjeve më të mira për Superligën dhe për futbollin botëror në tërësi.
Krijimi i ligës së re vjen kur pandemia globale ka përshpejtuar paqëndrueshmërinë e modelit aktual ekonomik të futbollit evropian. Për vite me radhë, klubet themeluese kanë synuar të përmirësojnë cilësinë dhe intensitetin e garave ekzistuese europiane dhe, në veçanti, të krijojnë një turne në të cilin mund të garojnë klubet dhe lojtarët më të mirë.
Pandemia zbuloi se kërkohet një vizion strategjik dhe qasje tjetër biznesi për të rritur vlerën dhe përfitimet në piramidën së futbollit. Në muajt e fundit ka pasur një dialog intensiv me organet drejtuese për formatin e ardhshëm të garave evropiane. Klubet themeluese besojnë se zgjidhjet e propozuara nuk u japin përgjigje pyetjeve themelore, të cilat janë qoftë nevoja për të ofruar ndeshje me cilësi të lartë si dhe për të pasur burime shtesë financiare për të gjithë botën e futbollit. ”
Formati i Super League-s shpjegohet gjithashtu në njoftimin për shtyp:
– Do të marrin pjesë 20 klube: 15 klubet themeluese dhe pesë skuadra të tjera shtesë, që që do të përzgjidhen çdo vit bazuar në performancën e sezonit të kaluar;
– Të gjitha ndeshjet do të luhen gjatë javës, të gjitha klubet do të vazhdojnë të garojnë në ligat e tyre përkatëse kombëtare, duke ruajtur kështu kalendarin tradicional;
– Sezoni do të fillojë në gusht me pjesëmarrjen e klubeve në dy grupe me nga 10 skuadra, të cilat do të luajnë ndeshje brenda dhe jashtë; Tri të mirat në secilin grup do të kualifikohen automatikisht në çerekfinale. Ekipet që përfundojnë në vendin e katërt dhe të pestë do të luajnë playoff shtesë. Më pas, do të luhet çerekfinalet dhe gjysmëfinalet me dy ndeshje, për të arritur në finale, e cila do ta përcaktojë fituesin në një takim të vetëm, në fund të majit, në fushë neutrale.
Pas krijimit të Super League-s së meshkujve, do të formohet edhe e femrave, që do të kontribuojë në avancimin dhe zhvillimin e futbollit edhe për këtë gjini.
Lajmi për krijimin e Super League-s së Europës në mënyrë të pashmangshme shkaktoi alarm në UEFA, e cila reagoi pak orë para vendimit të 12 klubeve për të njoftuar zyrtarisht lindjen e kompeticionit të ri.
UEFA dhe ligat evropiane kanë konfirmuar përmes një deklarate të përbashkët, se janë të gatshme të përjashtojnë nga garat kombëtare dhe ndërkombëtare të gjitha ekipet e përfshira në projektin e Super League-s. Gjithashtu, lojtarëve të këtyre klubeve do t’u ndalohet grumbullimi me ekipet kombëtare. Një deklaratë e vërtetë lufte për klubet e përfshira në krijimin e Super League-s.
“UEFA, Shoqata e Futbollit Anglez dhe Premier League, Federata Spanjolle (RFEF) dhe LaLiga, FIGC dhe Lega Serie A, lezohett në shënimin e lëshuar nga zyrat e UEFA-s në Nyon, kanë mësuar që disa klube angleze, spanjolle dhe italiane mund të jenë në procesin e njoftimit të krijimit të një të ashtuquajture Super League. Nëse kjo ndodh, ne duam të përsërisim se UEFA, Shoqata e Futbollit Anglez, RFEF dhe FIGC, Premier League, LaLiga dhe Lega Serie A, por edhe FIFA dhe të gjithë anëtarët tanë, do të qëndrojmë të bashkuar në përpjekjen tonë për të ndaluar këtë projekt cinik, një projekt i bazuar në interesat personale të disa klubeve në një kohë kur shoqëria ka nevojë për solidaritet më shumë se kurrë.
Ne do të shqyrtojmë të gjitha masat e mundshme, si gjyqësore dhe sportive, për të parandaluar që kjo të ndodhë. Futbolli bazohet në garë të hapur dhe merita sportive: nuk mund të jetë ndryshe. Siç ishte njoftuar më parë nga FIFA dhe gjashtë federatat, klubet në fjalë do të të skualifikohen nga çdo garë kombëtare, europiane dhe botërore dhe lojtarët e tyre do të ndalohen të përfaqësojnë ekipet e tyre kombëtare. Ne falënderojmë ato vende, veçanërisht klubet franceze dhe gjermane, të cilët refuzuan të nënshkruajnë këtë marrëveshje. ”
Liga e parë që u distancua dhe censuroi lindjen e një Super League ishte Premier League, e cila me një deklaratë zyrtare “dënoi çdo propozim që sulmon parimet e konkurrencës së hapur dhe meritës sportive, që është zemra e kampionateve kombëtare dhe europiane. Tifozët e çdo klubi në Angli dhe Europë mund të ëndërrojë që ekipi i tyre të arrijë majën dhe të luajë kundër më të mirëve. Ne besojmë se koncepti i një Super League Evropiane do ta shkatërronte këtë ëndërr.”
Qëndrim të ashpër kundër Super League-s ka mbajtur edhe FIFA.
“Duke marrë parasysh lajmet e publikuara nga media, FIFA dëshiron të sqarojë se merr anën e solidaritetit dhe barazisë në futboll, me një model që lejon rishpërndarjen e burimeve globalisht, duke pasur parasysh që zhvillimi është qëllimi i parë i FIFA-s.
Në vizionin tonë, sipas statutit tonë, çdo garë kombëtare, rajonale ose globale duhet të bazohet në solidaritet, përfshirje, integritet dhe drejtësi. Organet drejtuese të futbollit duhet të sigurojnë që kjo të mos cënohet.
FIFA shpreh zhgënjimin e saj për lindjen e një kampionati të mbyllur, që është jashtë strukturave. FIFA është në anën e unitetit dhe u kërkon të gjitha palëve që të bashkohen në dialog me qetësi, ekuilibër dhe në emër të lojës së ndershme. FIFA do të bëjë më të mirën e mundshme për të harmonizuar gjithçka në interes të futbollit”.
