2 persona në Tiranë janë arrestuar ditën e sotme për shkak se sillnin mallra kontrabandë nga Belgjika. Mësohet se në pranga ka rënë një 48-vjeçar, i cili sillte mallrat kontrabandë, ndërkohë që personi i dytë i arrestuar është një 45-vjeçar, i cili shiste në dyqanin e tij, veshjet e kontrabanduara. Po ashtu është proceduar penalisht dhe gruaja e 48-vjeçarit.
Njoftimi i Policisë:
Procedohet në gjendje të lirë bashkëshortja e 45-vjeçarit. Sekuestrohen veshje të ndryshme, të dyshuara të kontrabanduara, me peshë totale 5548 kg. Specialistët e Seksionit për Hetimin e Krimit Ekonomik dhe Financiar në DVP Tiranë, në bashkëpunim me Sektorin e Hetimit të Krimeve Ekonomike e Financiare në Drejtorinë e Përgjithshme të Policisë së Shtetit, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës së mallrave, pas një pune të mirëfilltë hetimore, kanë organizuar dhe finalizuar operacionin policor të koduar “Fake delivery”.
Si rezultat i këtij operacioni u bë arrestimi i shtetasve E. Ç., 45 vjeç dhe N. H., 58 vjeç, të dy banues në Tiranë. Gjithashtu u procedua në gjendje të lirë shtetasja L. Ç., 45 vjeçe. Gjatë kontrollit të ushtruar në subjektin në administrim nga shtetasi E. Ç., shërbimet e Policisë gjetën veshje të ndryshme të dyshuara të kontrabanduara, të cilat ishin transportuar nga Belgjika drejt Shqipërisë, nga shtetasi N. H. Në cilësinë e provës materiale u sekuestruan veshje të ndryshme të kontrabanduara, me peshë totale 5548 kg. Operacioni për goditjen e kësaj paligjshmërie vijon. Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
