Bahri Beci një emër i rëndësishëm i gjuhësisë shqipe u nda nga jeta në moshën 87-vjeçare, duke lënë pas një kontribut në historinë e shkencës dhe studimeve mbi gjuhën shqipe. Gjuhëtari Bahri Beci ishte anëtar i Akademisë së Shkencave dhe anëtar i jashtëm i Akademisë së Shkencave dhe Arteve të Kosovës. Kryesia e Akademisë së Shkencave të Shqipërisë ndër të tjera shprehet se ishte personalitet me veprimtari të shumanshme në disa fusha të gjuhësisë shqiptare historike e bashkëkohore për më shumë se gjashtë dekada; autor i dhjetëra veprave monografike dhe studimore në fushën e dialektologjisë, të fonetikës, të gramatikës, të rrugës së formimit të shqipes së njësuar, të historisë së gjuhës shqipe dhe të statusit të saj në lidhjen gjuhësore ballkanike. “Akademia e Shkencave u shpreh ngushëllimet e saj të thella familjes e të afërmve, anëtarëve të Asamblesë – familjes shkencore të tij – bashkëpunëtorëve të shumtë, studiuesve dhe studentëve”, thuhet nga ASH. Ndërsa Biblioteka Kombëtare e Shqipërisë, përmes një ekspozite homazh për akademikun dhe gjuhëtarin Bahri Beci (1936-2023), i cili u nda nga jeta, sjell në vëmendje të publikut kontributin e tij shkencor në fushën e gjuhësisë përmes botimeve të rëndësishme në fushën e dialektologjisë, fonetikës, gramatikës, gjuhës letrare, si edhe të historisë së gjuhës, si: “Të folmet veriperëndimore të Shqipërisë dhe sistemi fonetik i së folmes së Shkodrës”; “Gramatika e gjuhës shqipe”; “Probleme të politikës gjuhësore dhe të planifikimit gjuhësor në Shqipëri”; “Dialektet e shqipes dhe historia e formimit të tyre”; “Probleme të lidhjeve të shqipes me gjuhët e tjera ballkanike”; “Fonetika e gjuhës shqipe”; “Historia e standardizimit të shqipes”; “Struktura dialektore e shqipes”, etj. Kryesia e Akademisë së Shkencave dhe Arteve të Kosovës në një telegram ngushëllimi dërguar ASH me rastin e ndarjes nga jeta të akademik Bahri Becit shprehet se me studimet e tij dhe me punën drejtuese në institucionet e larta të shkencës në Shqipëri dha një kontribut të çmuar dhe la gjurmë të pashlyera në të gjitha fushat e veprimtarisë dhe të aktivitetit shkencor e studimor. Bahri Beci u lind në Shkodër në vitin 1936, në një familje me tradita atdhetare.
