Ministri grek i Mbrojtjes së Qytetarit, Janis Ikonomu ka reaguar pas takimit në burgun e Durrësit me Fredi Belerin.
Ikonomu i është drejtuar këtë herë me “urdhër” autoriteteve shqiptare duke kërkuar të lejohet menjëherë betimi i Belerit si kryebashkiak i Himarës.
Ai ka thënë se kjo është një çështje tepër serioze për Greqinë dhe se po hedh hije mbi marrëdhëniet mes dy vendeve.
“U takova sot në burgjet e Durrësit, në prani të ambasadores sonë në Shqipëri, znj. Konstantinas Kamitsi, me kryetarin e zgjedhur të Bashkisë Himarë, anëtar i minoritetit etnik grek të Shqipërisë, z. Fredis Beleris, i cili ka mbetur në paraburgim për më shumë se katër muaj”, deklaroi ministri i Mbrojtjes së Qytetarit, Janis Ikonomu.
“Për Greqinë, ky rast ishte që në fillim dhe mbetet jashtëzakonisht serioz. Respektimi i shtetit ligjor dhe të drejtave civile janë parimet dhe vlerat kryesore evropiane. Qëndrimi i Greqisë është se në rastin e z. Beleri, nuk merren parasysh parimet e shtetit ligjor, prezumimi i pafajësisë dhe respektimi i të drejtave civile. Pala shqiptare duhet të lejojë menjëherë betimin e zotit Beleris si Kryetar Bashkie, duke respektuar verdiktin e qytetarëve në zgjedhjet e fundit. Zgjerimi i situatës aktuale hedh seriozisht një hije mbi marrëdhëniet tona dypalëshe dhe nuk është në përputhje me acquis evropiane, me gjithçka që ajo përfshin”, deklaroi ai.
